पोखरा, ३० भदौ
जेन्जी आन्दोलनका क्रममा नेपाल टेलिकम प्रादेशिक निर्देशनालय पोखराको भवनबाट चोरी भएका रिचार्ज कार्ड बिक्रीवितरण तथा प्रयोग नगर्न नेपाल टेलिकमले अनुरोध गरेको छ ।
साथै चोरिएका रिचार्ज कार्ड कतै भेटिएमा टेलिकमको कार्यालय वा नजिकको प्रहरी कार्यालयमा बुझाउन भनिएको छ । निर्देशनालयका निर्देशक बसन्त लिङथेपले चोरिएका रिचार्ज कार्डबाट ब्लक भइसकेपनि ग्राहकहरु ठगिन सक्ने हुनाले सार्वजनिक रुपमा सूचित गरिएको बताए ।
निर्देशनालको भवन आगजनी तथा तोडफोडबाट क्षति भएको उनले बताए । टेलिकमले आधिकारिक बिक्रेताबाट मात्र रिजार्च कार्ड खरिदबिक्री गर्न आग्रह गरेको छ । टेलिकमका अनुसार एक सय रुपैयाँका ७० हजार वटा रिजार्ड कार्ड र पाँच सय रुपैयाँका दुई सय वटा रिजार्ड कार्ड चोरी भएको छ । टेलिकमले यी कार्डको सिरियल नम्बर समेत प्रकाशन गरेको छ।
