पोखरा, २४ माघ
आगामी फागुन २१ गते हुने प्रतिनिधिसभा सदस्य निर्वाचनको सुरक्षार्थ गण्डकी प्रदेशका ११ जिल्लामा सात हजार एक सय ४० प्रहरी परिचालन गरिने भएको छ । गण्डकी प्रदेश प्रहरी कार्यालयका अनुसार गोरखामा एक हजार तीन, मनाङमा एक सय ६३, लमजुङमा छ सय छ र कास्कीमा नौ सय ५७ प्रहरी परिचालन हुनेछन् ।
यस्तै तनहुँमा आठ सय ३८, स्याङ्जामा नौ सय ४०, नवलपुरमा आठ सय १८, मुस्ताङमा दुई सय दुई, म्याग्दीमा चार सय ११, बागलुङमा छ सय ५८ र पर्वतमा चार सय ३९ जना प्रहरी परिचालन हुने कार्यालयका सूचना अधिकारी प्रहरी वरिष्ठ उपरीक्षक तुलबहादुर कार्कीले जानकारी दिनुभयो ।
चारवटै सुरक्षा निकायको एकीकृत सुरक्षा योजना बमोजिम नेपाल प्रहरी मतदानस्थलको भित्री घेराको सुरक्षा खटिने उहाँको भनाइ छ । नेपाली प्रहरीसँगै निर्वाचन प्रहरी पनि पहिलो तहको सुरक्षा घेरामा परिचालित हुनेछ । प्रदेशमा १४ हजार १२ जना निर्वाचन प्रहरी खटाइने प्रहरी वरिष्ठ उपरीक्षक कार्कीले बताउनुभयो ।
निर्वाचन प्रहरीको छनौट र नियुक्तीपछि अहिले सुरक्षा तालिम सञ्चालन भइरहेको उहाँको भनाइ छ । दोस्रो तहको सुरक्षा घेरामा सशत्र प्रहरी बल र सुरक्षा घेराको बाहिरी तहबाट नेपाली सेनाले सुरक्षा प्रदान गर्ने जनाइएको छ । १८ प्रतिनिधिसभा निर्वाचन क्षेत्र रहेको यस प्रदेशमा कुल कुल १८ लाख ७० हजार ६५ मतदाता रहेका छन् ।
प्रदेश निर्वाचन कार्यालय, पोखराका अनुसार सबैभन्दा बढी कास्कीमा तीन लाख आठ हजार पाँच सय ७२ मतदाता रहेका छन् । सबैभन्दा कम मनाङमा मतदाता संख्या जम्मा सात हजार रहेको छ । स्याङ्जामा दुई लाख ४८ हजार आठ सय १६, तनहुँमा दुई लाख ५४ हजार तीन सय ९७, नवलपुरमा दुई लाख ६८ हजार पाँच सय २६, गोखरामा दुई लाख २९ हजार ५८ र बागलुङमा एक लाख ९३ हजार एक सय ८१ मतदाता रहेका छन् ।
यस्तै लमजुङमा एक लाख ३७ हजार एक सय २४, पर्वतमा एक लाख २५ हजार चार सय ६६, म्याग्दीमा ८६ हजार तीन सय ९७ र मुस्ताङमा ११ हजार तीन सय ३८ मतदाता रहेका छन् । प्रदेशका ११ वटै जिल्लामा गरी १२ सय ९७ मतदानस्थल र २३ सय ९६ मतदान केन्द्र रहेको जनाइएको छ ।
