पोखरा, २७ भदौ
गण्डकी प्रदेशका प्रदेश प्रमुख डिल्लीराज भट्टले प्रदेशसभाबाट पारित भई आएको ‘गण्डकी प्रदेशमा खाद्य अधिकार तथा खाद्य गुणस्तर सम्बन्धमा व्यवस्था गर्न बनेको विधेयक’ प्रमाणीकरण गर्नुभएको छ ।
प्रदेश प्रमुख भट्टले संविधानको धारा २०१ को उपधारा (२) बमोजिम उक्त विधेयक आज प्रमाणीकरण गर्नुभएको प्रदेश प्रमुखको कार्यालयका प्रवक्ता प्रवीण पौडेलले जारी गर्नुभएको विज्ञप्तिमा उल्लेख छ ।
प्रदेशसभा सचिवालयले यही भदौ १८ गते उक्त विधेयक प्रमाणीकरणका लागि प्रदेश प्रमुखको कार्यालयमा पठाएको थियो । विधेयक प्रमाणीकरण भएसँगै उक्त विधेयक अब कानुनका रूपमा कार्यान्वयनको प्रक्रियामा अघि बढ्ने जनाइएको छ ।
