पोखरा, २१ साउन
मर्दी हिमालको पदयात्राबाट फर्कने क्रममा कास्कीको माछापुछ«े गाउँपालिका–९ बादलडाँडा नजिकको जङ्गलबाट सम्पर्कविहीन बनेका तीन युवक सकुशल भेटिएका छन् । बुधबार बिहानदेखि हराएका पोखरा महानगरपालिका–१४ खसीबजार बस्ने २४ वर्षीय अजित जिसी, २३ वर्षीय युकेश गुरुङ र २६ वर्षीय करण लामा आज बिहान अन्नपूर्ण गाउँपालिका–११ छुमरुङवेशीमा भेटिएको जिल्ला प्रहरी कार्यालयले जनाएको छ ।
कार्यालयका प्रहरी नायब उपरीक्षक वीरेन्द्रकुमार पासवानले अहिले युवकहरुको उद्धार गर्ने कार्य भइरहेको बताउनुभयो । “तीनै जना युवक सकुशल भेटिनुभएको छ, अहिले उद्धार गर्ने काम भइरहेको छ”, उहाँले भन्नुभयो । बुधबार बिहान ८ बजेसम्म सम्पर्कमा रहेकामा त्यसपछि युवकहरुको मोबाइल बन्द भएको थियो ।
जङ्गलमा बाटो बिराएर अलपत्र परेका उनीहरुको खोजीमा नेपाली सेना, सशत्र प्रहरी बल, जनपद प्रहरीलगायत स्थानीयवासी जुटेका थिए । मर्दी हिमालको हाइ क्याम्पबाट पोखरा फर्कने क्रममा बादलडाँडाको जङ्गलमा हराएका युवकहरु मोदी खोलाको पारिपट्टि छुमरुङवेशीमा भेटिएको घान्द्रुक प्रहरी चौकीका प्रहरी नायब निरीक्षक राजेन्द्र पौडेलले जानकारी दिनुभयो । – राम थापा
