बागलुङ, ३० वैशाख
बागलुङ दुग्ध उत्पादक सहकारी संघ लिमिटेड बागलुङले गत आर्थिक वर्षमा १० करोड ९९ लाख रुपैयाँभन्दा बढीको कारोबार गरेको छ । त्यमध्ये दुग्ध उत्पादक किसानलाई रू। आठ करोड ८४ लाख रुपैयाँभन्दा बढी भुक्तानी गरिएको संघले जनाएको छ ।
संघको २६औँ स्थापना दिवसका अवसरमा बुधबार आयोजित अन्तरक्रिया कार्यक्रममा बोल्दै संघका अध्यक्ष दीपक गौतमले सहकारीले १५ वटा सहकारीमार्फत करिब एक हजार ५ सय किसानको घरबाट दैनिक ३ हजार ५ सय लिटर दूध सङ्कलन गरी बिक्री–वितरण गर्दै आएको बताउनुभयो ।
बागलुङ नगरपालिका र काठेखोला गाउँपालिकाका दूध उत्पादक किसानको समूहबाट २०५८ सालमा स्थापना गरिएको सहकारीले विभिन्न चुनौतीसँग जुध्दै बागलुङमा दूध तथा दुग्धजन्य वस्तुको उत्पादन र बिक्री गर्दै आएको उहाँको भनाइ थियो । उहाँले गुणस्तरीय उत्पादनलाई प्राथमिकता दिँदै कृषकको प्रोत्साहनका लागि पशु बीमा, प्रशोधन सुरक्षा लगायतका कार्यक्रम सञ्चालन भइरहेको जानकारी दिनुभयो ।
अध्यक्ष गौतमले सहकारीलाई दीर्घकालसम्म सञ्चालन गर्ने उद्देश्यसहित आधुनिक भवन निर्माणका लागि जग्गा व्यवस्थापनको काम अघि बढाइएको पनि बताउनुभयो । उहाँले बढ्दो महँगीको तुलनामा दूधको मूल्य वृद्धि गर्न नसकिएको उल्लेख गर्दै मूल्य समायोजनका लागि पहल भइरहेको जानकारी दिनुभयो ।
खुला बजारका कारण बाहिरबाट दूध तथा दुग्धजन्य वस्तु बागलुङ भित्रिए पनि दूध उत्पादनमा बागलुङ आत्मनिर्भर रहेको उहाँले बताउनुभयो । सहकारीले पछिल्लो समय मोही उत्पादन तथा बिक्रीसमेत सुरु गरेको छ । यसको प्रचार–प्रसार र प्रवर्द्धनका लागि स्थापना दिवसको अवसरमा जेठ १ गते समिक्षालय चोकमा निःशुल्क मोही वितरण गरिने जनाएको छ ।
हाल सहकारीले दूध, दही, घ्यू, छुर्पी, पनिर, खुवा, मोही तथा नौनी उत्पादन एवं बिक्री–वितरण गर्दै आएको छ । कार्यक्रममा संस्थाका उपाध्यक्ष रामबहादुर हमालले स्वागत मन्तव्य व्यक्त गर्नुभएको थियो । अध्यक्ष दीपक गौतमको अध्यक्षता तथा संस्थाका सचिव गोविन्दप्रसाद सापकोटाको सञ्चालनमा सम्पन्न कार्यक्रममा जिल्ला सहकारी संघ बागलुङका सल्लाहकार रामबहादुर जिसीले शुभकामना मन्तव्य व्यक्त गर्नुभएको थियो ।
