पोखरा, १६ माघ
आगामी फागुन २१ गते हुने प्रतिनिधिसभा सदस्य निर्वाचनका लागि गण्डकी प्रदेशका ११ जिल्लामा १४ हजार १२ जना निर्वाचन प्रहरी परिचालन गरिने भएको छ । गण्डकी प्रदेश प्रहरी कार्यालयका अनुसार गोरखामा २२ सय चार, मनाङमा दुई सय ३३, लमजुङमा १२ सय १०, कास्कीमा दुई हजार आठ र तनहुँमा १५ सय ७३ निर्वाचन प्रहरी परिचालन गरिने भएको हो ।
यस्तै स्याङ्जामा १९ सय ४७, नवलपुरमा १५ सय ४३, मुस्ताङमा दुई सय ६६, म्याग्दीमा सात सय ६५, बागलुङमा १२ सय ९८ र पर्वतमा नौ सय ६५ जना निर्वाचन प्रहरी खटाइने कार्यालयका सूचना अधिकारी प्रहरी वरिष्ठ उपरीक्षक तुलबहादुर कार्कीले जानकारी दिनुभयो । उहाँका अनुसार नेपाल प्रहरीबाट निर्वाचन सुरक्षाका लागि सात हजार एक सय ४० जना परिचालन गरिने भएको छ ।
नेपाल प्रहरीतर्फ गोरखामा एक हजार तीन, मनाङमा एक सय ६३, लमजुङमा छ सय छ, कास्कीमा नौ सय ५७, तनहुँमा आठ सय ३८, स्याङ्जामा नौ सय ४०, नवलपुरमा आठ सय १८, मुस्ताङमा दुई सय दुई, म्याग्दीमा चार सय ११, बागलुङमा छ सय ५८ र पर्वतमा चार सय ३९ जना खटिने छन् ।
११ वटै जिलालामा निर्वाचन प्रहरीको छनोट भई नियुक्ति र तालिमको प्रकृया सुरू भएको छ । आइतबार नियुक्ति दिएर तालीममा सहभागी गराइने कास्कीका सहायक प्रमुख जिल्ला अधिकारी एवं निर्वाचन प्रहरी भर्ना छनोट तथा नियुक्ति समितिका सदस्य सचिव चित्रागंत बरालले जानकारी दिनुभयो ।
निर्वाचन प्रहरी भर्नामा नेपाली सेना, नेपाल प्रहरी, सशस्त्र प्रहरी बलबाट सेवानिवृत्त पूर्वसुरक्षाकर्मी, पूर्ववनरक्षक, यसअघि सम्पन्न भएका विभिन्न निर्वाचनमा म्यादी प्रहरीका रूपमा सन्तोषजनक काम गरेका व्यक्ति र विदेशी मित्र राष्ट्रका सुरक्षानिकायमा काम गरी सेवानिवृत्त भएका नेपाली नागरिकलाई प्राथमिकता दिइएको उहाँले भनाइ छ । छनोटमा परेका निर्वाचन प्रहरीलाई दस दिनसम्म तालीम दिइने समितिका सदस्य सचिव बरालले बताउनुभयो ।
निर्वाचन प्रहरीको कार्य अवधि ४० दिन तोकिएको छ। निर्वाचन प्रहरीले ४० दिनको रु। ३४ हजार ७७६, खाद्यान्न र पोसाकबापतको रकम, तयारी खर्च रु। ८४६ र चार दिनको खाजा खर्च रु। एक हजार २०० उपलब्ध गराइने भएको छ । प्रमुख जिल्ला अधिकारीको संयोजकत्वमा रहेको उक्त समितिले निर्वाचन प्रहरी नियुक्त गर्नेछ ।
