बागलुङ, १० माघ
बागलुङमा आगामी फागुन २१ गते हुने प्रतिनिधिसभा सदस्य निर्वाचनमा खटिने निर्वाचन प्रहरीका लागि दरखास्त दिने म्याद दुई दिन थप गरिएको छ । यसअघि दुईपटकसम्म दरखास्त माग गरिएकामा आवेदन कम परेको हुनाले आइतबारसम्म म्याद थप गरिएको जिल्ला प्रहरी कार्यालयले जनाएको छ ।
बागलुङमा १२ सय ९८ निर्वाचन प्रहरी खटाइने जिल्ला प्रहरी कार्यालयका प्रमुख प्रहरी उपरीक्षक तिलक भारतीले जानकारी दिए । निर्वाचन प्रहरीका लागि जिल्ला प्रहरी कार्यालय, इलाका प्रहरी कार्यालय बरेङ, गलकोट र बुर्तिबाङमा दरखास्त बुझाउन सकिने जनाइएको छ । प्रमुख जिल्ला अधिकारीको संयोजकत्वमा रहेको निर्वाचन प्रहरी भर्ना छनौट तथा नियुक्ती समितिले निर्वाचन प्रहरीको छनौट र नियुक्ती गर्नेछ ।
प्रहरी भर्नामा नेपाली सेना, नेपाल प्रहरी, सशस्त्र प्रहरी बलबाट सेवानिवृत्त पूर्वसुरक्षाकर्मी, पूर्ववनरक्षक, यसअघि सम्पन्न भएका विभिन्न निर्वाचनमा म्यादी प्रहरीका रुपमा सन्तोषजनक काम गरेका व्यक्ति र विदेशी मित्र राष्ट्रका सुरक्षा निकायमा काम गरी सेवानिवृत्त भएका नेपाली नागरिकलाई प्राथमिकता दिइने भएको छ ।
१८ वर्ष पूरा भई ५४ वर्ष ननाघेको साधारण लेखपढ गर्न जान्ने व्यक्तिले निर्वाचन प्रहरीका लागि दरखास्त दिन पाउने जनाइएको छ । निर्वाचन प्रहरीले ४० दिनको रु. ३४ हजार सात सय ७६, खाद्यान्न र पोशाक बापतको रकम, तयारी खर्च रु. आठ सय ४६ र चार दिनको खाजा खर्च रु. १२ सय उपलब्ध गराइने छ ।
