बागलुङ, १० मङ्सिर
नेपाल कम्युनिष्ट पार्टी (एमाले)को आसन्न ११औँ राष्ट्रिय महाधिवेशनका लागि प्रतिनिधि छनोट गर्न प्रतिनिधि सभा अन्तर्गत बागलुङ–१ मा ३९ जनाले उम्मेदवारी दिएका छन् । छ जना महाधिवेशन प्रतिनिधिका लागि ३९ जनाले मनोनयन दिएको एमाले जिल्ला अध्यक्ष हिराबहादुर केसीले जानकारी दिए ।
खुलातर्फ तीन जना प्रतिनिधिका लागि २२ जनाले उम्मेदवारी दिएको उनले बताए । दुई जना महिला प्रतिनिधिका लागि सात जना र एक युवा प्रतिनिधिका लागि दस जनाले मनोनयन दर्ता गराएका छन् ।
प्रतिनिधि छनोटमा सहमति नजुटे आउँदो शनिबार मतदान हुने अध्यक्ष केसीले बताए । निर्वाचन क्षेत्र नं. १ मा रहेका तीन हजार एक सय ८१ ज्ना सङ्गठित सदस्यले मतदान गर्नेछन् । बरेङ गाउँपालिकाको केन्द्र, जैमिनी नगरपालिकाको केन्द्र कुश्मीसेरा, बागलुङ नगरपालिका र काठेखोला गाउँपालिकाको बागलुङ बजारमा मतदान केन्द्र तोकिएको उनको भनाइ छ ।
निर्वाचन क्षेत्र नं. २ मा बिहीबार एमालेले बैठक डोकेको छ । उक्त क्षेत्रबाट चार जना महाधिवेशन प्रतिनिधि चुनिनेछन् । दलिततर्फ जिल्लाबाट एक जना प्रतिनिधि छनोट हुने एमालेले जनाएको छ । पदेन ९ जनासहित २० जना महाधिवेशन प्रतिनिधिले महाधिवेशनमा भाग लिने अध्यक्ष केसीले बताए ।
