पोखरा, १७ असोज
जल तथा मौसम विज्ञान विभागले शुक्रबार (आज) देखि सोमबारसम्म गण्डकी प्रदेशमा मध्यमदेखि भारी वर्षाको पूर्वानुमान गरेसँगै जिल्ला प्रशासन कार्यालय, कास्कीले उच्च सतर्कता अपनाउन सबैमा अनुरोध गरेको छ । बिहीबार सार्वजनिक सूचनामार्फत कार्यालयले अति जरुरी नपरी टाढाको दुरीमा र रातको समयमा यात्रा नगर्न भनेको हो ।
बाढीपहिराको उच्च जोखम भएका क्षेत्र र नदी÷खोला किनारमा बाढीको बहाव उच्च हुन लागेमा सो स्थानमा नबसी सुरक्षित स्थापनमा बस्न आग्रह गरिएको छ । वर्षात्को समयमा राजमार्ग तथा ग्रामिण सडकमा सवारीसाधनलाई संयमतापूर्वक सञ्चालन गर्न र क्षमताभन्दा बढी यात्रु नचढाउन यातायात व्यवसायी र सवारी चालकलाई अनुरोध गरिएको छ ।
बिरेठाँटीदेखि घान्द्रुक, बिरेठाँटीदेखि उल्लेरी, लुम्लेदेखि लान्द्रुक र काहुँखोलादेखि ताङतिङ÷सिक्लेस जाने सवारीसाधन शुक्रबारदेखि अर्को व्यवस्था नभएसम्मका लागि दिउँसो ४ बजेभित्रैमा छुट्ने भएका छन् । सोही मार्गबाट फर्कने सवारीसाधनलाई शनिबार बिहान ५ बजेपछि गन्तव्यस्थलका लागि छुट्ने व्यवस्था मिलाइएको छ ।
कार्यालयले उच्च हिमाली क्षेत्रमा हिमपातकोसमेत समम्भावना रहेकाले अन्नपूर्ण हिमाल, मर्दी हिमाललगायतका क्षेत्रको पदयात्रामा नजानमा पदयात्राी पर्यटकलाई आग्रह गरेको छ । कुनै विपद्जन्य घटना भएमा सम्बन्धित स्थानीय तह, जनप्रतिनिधि, नजिकको प्रहरी इकाइ, सुरक्षा निकाय र स्थानीय प्रशासनमा तुरुन्त सम्पर्क गर्न अनुरोध गरिएको छ ।
स्थानीय तह, रेडक्रससहित साझेदार संस्था, निजी क्षेत्र, नागरिक समाजलगायत सरोकार भएका पक्षलाई विपद् प्रतिकार्यका लागि तयारी अवस्थामा रहन भनिएको छ ।
