बागलुङ, १२ असोज
‘जेनजी’ आन्दोलनका क्रममा आगजनीमा परेको मुलुकको प्रमुख प्रशासनिक केन्द्र सिँहदरबार पुनःनिर्माणका लागि बागलुङ कलाकार समाज, नेपालले आर्थिक सहयोग अभियान सुरु गरेको छ ।
सेवा, सन्देश र मनोरञ्जनलाई मुख्य उद्देश्य बनाएर स्थापित उक्त समाजले यही असोज ६ गते काठमाडौँमा आयोजना गरेको दसैँ, तिहार, छठलगायत पर्वको ‘भर्चुअल’ शुभकामना आदानप्रदान कार्यक्रममा उक्त अभियानको घोषणा गरिएको हो ।
पुनःनिर्माण कोषमा संस्थाका तर्फबाट रु. ५० हजार राखेर अभियान सुरुवात गरिएको समाजका अध्यक्ष लोकगायक बसन्त थापाले बताए । “अहिलेसम्म झण्डै डेढ लाख रुपैयाँ सङ्कलन भइसकेको छ”, उनले भने, “धेरै रकम सहयोग गर्न नसकेपनि देशलाई अफ्टेरो परेका बेला सन्देश दिन खोजिएको हो ।”
तिहारसम्म अभियान सञ्चालन हुने र त्यसपछि सरकारको कोषमा रकम जम्मा गरिने अध्यक्ष थापाले बताए । सुरुमा समाजका तर्फबाट मात्र केही रकम दिने भनिएकामा पछि देशविदेशमा रहेका कलाकारलगायत अन्य शुभेच्छुकहरुले सहयोगको इच्छा देखाएपछि अभियान अगाडि बढाइएको हो ।
अध्यक्ष थापाले सरकारले सुरु गरेको पुनःनिर्माण कार्यमा सहयोगको भावना जागृत गराई अरु सङ्घसंस्थालाई पनि त्यसतर्फ प्रेरित गर्न सन्देशमूलक ढङ्गले यो अभियान सुरु गरिएको बताए ।
सरकारले केही दिनअघि ‘जेनजी’ आन्दोलनका क्रममा क्षति भएका सार्वजनिक तथा सरकारी भौतिक संरचनाको पुनःनिर्माण, मर्मत, आर्थिक पुनरुत्थान, र राहत कार्यमा लागि भौतिक पूर्वाधार पुनःनिर्माण कोषमा योगदान गर्न सबैमा आव्हान गरेको थियो ।
